زوز عصافير

كان يا ما كان زوز عصافير زيد وعبير خوّنهم المصير 

في دنيا ملعونة ما عندهمش جناحات كيف بقية الطير.
عصافير تحلم ترقد كيف الناس على سرير وبحرية تسير
حلمهم في عيون الناس صغير وفي عيونهم حلم كبير
غصة في قلوبهم وكلمتهم الدافية حابسة في الحناجير.

الساق محفورة من الحفا
والعين ذابلة تاعبة بالبكا

في العيون قصيدة تحرك الوجدان
تلعن الزمان وتحقّر الانسان
و تصورلك البؤساء أبيض وأكحل من غير ألوان
وتوصفلك قداش يعاني العطشااااااان...

يدها اليسار على خدها ما لقات لشكون تشكي كربها
يدها اليمين على جبين خوها وتفكر في المسكين بوها زعمة التعب عمل فيه شوهة؟
خوها ناعس وجهو الشمس حرقّتو أسمر بنين حنين يدوّخ العيون لي تفهم في الزين
جيعان على فطيرة من آمس ما عندوش التخرنين
أما حزين، حزين ويسأل في أختو علاش احنا عايشين؟علاش جينا ووين ماشين؟ علاش احنا منسيين؟