مذكرات ملحد تونسي--الحلقة 1

أيا نهار فدّيت من قعدة الدار ومل العباد لتشعل في النار زعام كان في القبيحة والعار ما يسلم منهم كان الحڨار زعام كان في التكمبيس ونصبان منادف الفار وسبان الكفار وتخوين رشيد عمار. الكلهم طيب جعبة ويعرفوا المتخبي ولي صار ولا يسكتوا لا ليل ولا نهار...خذيت الكار وتعديت لصاحبي أيمن باش نعملوا كعبات  في البار بلكشي ننسى الخنار! أيمن زادة فادد من نفخ التوانسة والمحللين السياسيين إلي نهار كامل يزنوا في روسنا قلش علينا في سوق النحاسين و ما كانش مل العاكسين وقلي إلى البار سر ندخلولو سالمين فايقين ونخرجو منو بالعين.

لحنالها بالشرب بالعمل الواحد واقف بالسيف أما عاملين بون كيف. خرجنا مل البار نغنيو خطوة في الأرض وخطوة في السماء حتى لين وصلنا قدام الكرهبة بالصدفة قلش عليه عطشان في الصحراء و لقا الماء...

أنا: انتي بالعو يا أيمن ما تسوقش الكرهبة تاو ناخذو تكسي نروحو وغدوة أرجع هزها من الباركينغ.

أيمن: روح نيك و يزي مل الكبي!  برى إنت خوذ تكسي ولا روح على ساقيك أنا مروح بلكرهبة و يدك في الزبي!

أنا: أيا برا نيك أمها محسوب حتى كان متنا، نكنا و البحار فتنا و الدنيا لعبت بينا و تنكتنا. نموت ولا نبقى نعاني في بهامة الرهوط ولا نشوف ببال كحلة تعوم في الشطوط...

طلعنا في الكرهبة وركبت السنتير كالعادة وعارف أيمن باش يدخل بينا في المادة وهاو باش نحكيلكم علي صار يا سادة. 

أيمن: يا تنحي ربها السنتير يا تهبط تروح على ساقيك كي المكسور طالع على سلوم حديد في بير. كي انتي معندكش ثيقة فيا أهبت اش مطلعك معايا؟مالا حكاية!   

أنا: نعرف ربك كيف تسكر تولي تطلع بطلايع كي صرمك وتخرج كان الزبالة من فمك! هاني نحيت زك أمها!

أيا خدم الكرهبة وطلعنا دايخين بالخطورة مناش شالقين أما عارفين الموت جاي ومناش فانين كيما ماركس ولينين و بديت نتقوحب عليه:  

أنا: برجولية الرسول قال من كان أخر كلامه لا إله إلا الله دخل الجنة أنا واحد من الناس عارفك الليلة باش تدخل بينا في حيط لذا لازمني ناخذ إحتياطي ترسيش لزبي معدي بقية حياتي في جهنم عاري زنتيط مع داروين وانشتاين وبقية العلماء معلقين من كرارزنا بخيط. انتي على الأقل agnostique وينجم يسامحك ربي كيف تقولوا راني مزلت نلوج عليك، أما أنا ملحد من دنيتي للمشوى متاع جهنم بجنب فرعون وجماعة التحنيط.

أيمن: أما خير ربك ولا تحب زغلول النجار وجماعة قناة الرحمة يعملولك ببول البعير دخلة و تبات للسرد مع الصحابة في خيمة ولا تحت نخلة؟؟؟

أنا: لا خويا تنفيخ تحت الخيمة ولا مشوي قاعد على دبوزة ديما! لا إله الله محمد رسول الله! لا إله إلا الله محمد رسول الله!

وأنا هكاكة نعاود في الشهادة أيمن يدخل بينا على يسار الكياس وصدم في كرهبة الناس وأنا راسي تحل قلش عليه مضروب بفاس! أخر كلمة قلهالي أيمن وهو مازال يتنفس: ما نحبش نموت!ما نحبش نموت! ما نحبش نبكي أمي! ما نحبش نبكي بابا! وأنا زادة بعد بدقايق الروح طلعت لمولاها و حصل ما في الصدور و إلي فاها فاها...

أيا جات الحماية وهزت الجثث متاعنا للسبيتار وبعد بنص ساعة بديت نسمع في الصياح والبكا العايلة الكل جات وعايلة أيمن كيف كيف وعملوا طرح نديب الحاصيلو مشهد لا يوريك...

امت غدوة الصباح الطبيب قلهم تنجموا تروحوا بولادكم تدفنوهم ياخي تلفتلو خويا الكبير(ملحد كيفي) وقلوا خويا قبل ما يموت كان ديمة يوصي فينا باش نعطيو الأعضاء متاعو يتبرع بيهم لمريض ولا حاجة، هذا طبعاً كان مازال في بدنو حاجة تصلح. تلفت بويا وقالوا سكر فمك هذا لمزال!!! حتى شعرة ما تنقص من ولدي حتى في الدين حرام!

أيا روحوا بيا للدار وكالعادة نفخوهملي بالبكاء والصياح وتلمت الحباب من كل شيرة باش يكملوا طرح النديب ويا ديني منيك ها الليلة... بعدها بساعات جاو جماعة بولحية للدار وجاء معاهم عمي الامام الخامس متاع الجامع. جبد بويا وحدو وبدا يوشوشلو: سيدي( لكبير في العيلة ديمة خواتو يسميوه سيدي) ولدك مرتد وزايد نغسلوه ونصليو عليه صلاة الجنازة حرام في الدين والرسول صلى الله عليه وعلى أله وصحبه وصانا باش ما نصلوش على المرتد.

بابا: ولدي مسلم وكان عز الناس يزي بلا تخلويذ وهزان ونفضان أمثالكم خلوا الغرب يضحكوا على المسلمين وعلى بهامتهم!

تكرز عمي وقلو: أنا واحد  من الناس مانيش باش نصلي معاكم ومنيش باش نمشي للجنازة أصلاً. هذا ربي أشنوا قال...

بابا: ما تجيش للجنازة لاك خويا ولا نعرفك. ابعد من قدام وجهي... 

أيا حاصيلو غسلوني وصالاو عليا وهزوا دفنوني أنا وأيمن في نفس الوقت وبحث بعضنا في الجبانة والحاجة الباهية عمي حضر في الجنازة ممكن خاطر تفكر إلي هو كان يحبني وأنا صغير وكان ديمة يتفوخر بيا خاطر كنت ديمة لول في المدرسة والليسي وكان ديمة يشريلي كساوي ويعطيني مصروفي كيف تڨين على بابا. فرحت حسيت إلي جماعة بولحية رغم إلي دارو بيه ما نجموش يكسحولو قلبوا وينسوه في ولد خوه إلي عمرو ما تعدى على غيرو وو عمرو ما ضلم واحد... 

أيا حاصيلو روحوا لعباد الكل وأنا نسمع في قرع نعالهم وبقيت أنا وأيمن نبومو وحدنا في الجبانة تلفتلو متكرز--

أنا: ريت القحب متاعك وين يوصل؟؟؟ ريت دربك ما تسمعش الكلام! مش قتلك ناخذو تكسي؟؟؟ يعطيك كان بعصبة على صرمك...

أيمن: تي برا نيك اش تنيك بيها الدنيا؟؟ عجبتك الدنيا وإلي صاير فيها؟؟؟ تحب ترجع تشوف الملاين لقاعدة تموت بالجوع؟؟؟ تحب ترجع تشوف مصيبة كيما كارثة اليابان؟؟؟تحب تشوف العباد تستعبد في عباد على خاطر الفلوس؟؟؟تحب تشوف العباد تقتل في العباد على وهم اسمو ألدين؟؟؟احمد صرمك ربك! هاك رابح راحتك هنا...

احنا نحكيو وجاو زوز هوكش(ناكر و نكير) يشبهوا لشخصية ريتها قبل في لعبة  Mortel combat. هازين في يديهم مطرقة متاع حديد تضرب بيها اليهودي يستسلم!!!  تلفتو لأيمن وسألوه من ربك؟

أيمن: مو قولو رب السلام عليكم ساعة! طول تسأل؟؟؟

الهوكش تكرزو و قالوا: قلنا من ربك؟!!!!!

أيمن: باهي... أنا agnostique منعرفش!

يهز واحد منهم المطرقة ويضربو على راسو لين ردوهولو كي الفطيرة وأيمن الخلايا لي في بدنو الكل ماتو مهوش حاسس بحتى وجيعة بالطبيعة...

تلفت وقلي: ريت ربك مزبرو الموت! هههه هاو ولينا نلعبو في Mortal combat في الواقع مش في البلاي ستايشن! هههه...

أيا كملوا كورو بيه وعبثوا بحالو وبعد جاء حنش كبير يتكلم! أي نعم حنش يتكلم وقال أنا الشجاع الأقرع! وبدا ياكل في اللحم متاع أيمن من الراس حتى لصبع ساقوا وبعد جاء راجل وجهو كي الزبي ريحتو ناتنة كالسفج تلفت أيمن وقالوا: أشكونك ومنين جيت مخيب عليك من وجه! منتك رب ريحتك!تفيييه. 

الراجل: أنا تجسيد لعمايلك المنيكة في الدنيا!

أنا نخزر وحال فمي في إلي قاعد نشوف فيه وفي نفس الوقت  تمنيت راني ميت من هاك العام! أفلام 3D على المباشر مستحيل يوصل الانسان يعمل كيفهم! 

جاء الدور عليا أنا وجاو هاك الزوز الهوكش وقالولي: انتي لقلت لا إله إلا الله قبل ما تموت؟

أنا: أنا هو هههه!

الهوكش: هاك حشيتو باش تدخل للجنة أما قبل لازمك تعدي أيامات سرسي في جهنم على الكفر متاعك!

أنا: ياخي الله يحب الحشوات؟ راني نتقوحب وقت لي قلتها!!!ياخي جدت عليه؟؟؟ 

الهوكش: أي نعرف مش كان انتي تتقوحب، المسلمين الكل يتقوحبو مفما حتى واحد يمن بكتاب لكلو تناقضات. تي هو كيف يقولوك الله يحب الانسان والله قدير وبعد يسيب عليهم الأمراض والفيضانات يدخلوا بعضهم في التناقض. أما مش هذا المهم المهم أنك تقول هاك كلمة التوحيد. التناقضات والدلائل القاطعة على عدم وجود الله هي فخ عملها الله باش المشوى متاع جهنم تتعبا.           

أنا: ممم... حقنا نقولوا القحبون الأكبر في بلاصة الله أكبر!!!

أنا: ياخي تشمو توا في ريحة شراب تعيف؟ وتسمعوا في صوت محمد حسان وراشد الغنوشي؟

الهوكش: أي هذيكا ريحة الجنة إلي ينجح في الامتحان يشم ريحة الجنة وهو في القبر. أيا توا لازمنا نمشيو العرش متاع الله مال على اليسار ولازمنا نرجعوه لبلاصتو!

أيا مشاو وخلوني وحدي تلفت لأيمن ما لقيتوش وبقيت نبوم وحدي في وسط هاك القبر الضيق. امشي يا زمان ايجا يا زمان سمعت حس ذكرني في هاك الجماعة ليدورو في رمضان على الديار ويقولوا "قوموا إتصحرو! قوموا إتصحروا!". لكن الجماعة المرة هاذي يقولوا " يوم القيامة جاء، قامت الساعة"

عرفت وقتها إلي أنا معادش باش نقعد وحدي وعرفت إلي أنا باش نعرف أخيراً جهنم والجنة وإلي باش يحصلي الشرف باش نقابل ناس بكري...جاني واحد هوكش وقلي اجا معايا باش تعدي أيامات في جهنم...فرحت وقمت متعطش للتجربة الجديدة إلي باش نمر بيها وخاصة وأنا متأكد إلي مل اليوم باش تكون عندي  برشة مغامرات، برشة حكايات...