أخيراً جات اللحظة لي وقفت فيها قدام باب جهنم! عارق نتنفس بالسيف من وهج السخانة ما نجم نتكلم! أما الكلو يهون ما دام الواحد باش يشوف ويتعلم! وعلى ناس بكري نتعرف ونسلم!
أيا دخلت مل الباب الرئيسي ياخي لقيت قدامي بنية عالية فيها 7 طوابق مفماش دالة بين كل طبق والطبق لي بعدو أما تنجم تفرق بيناتهم بالألوان المختلفة، الطبق لولاني لونو أحمر كيما لون النار لنشوفها كي نشّّعل الحطب وكل ما تطلع طابق اللون يزيد يغماق لين يولي عاطي على الأزرق في الطابق السابع...تلفتت للهوكش:
أنا: ياخي شنية حكاية الطوابق هاذم؟؟؟ مش فما جهنم وحدة للناس الكل؟؟
الهوكش: لا لا! فما 7 طوابق وكل طابق خاص بنوعية معينة مل العباد، مثلاً الطابق لولاني عملو ربي للمسلمين العاصين وهي طبقة باردة مقارنةً بالطبقة الثانية وكل ما تطلع الفوق سخانة النار تولي الدوبل.
أنا : شكون فيها بقية الطوابق؟
الهوكش: الطبقة السابعة فيها الفراعنة الكل ابدى من الفرعون الاول ونتي ماشي ومعاهم إبليس. الطبقة السادسة فيها الملحدين من بني البشر وفيها كائن جديد ما تعرفوش؛ كائن يشبه برشة للإنسان وعندو 99% مل ADN كيف الإنسان جاء بعد ما متت انتي ب-10000 سنة تقريباً والكلهم ملحدين والعياذ بالله! الطبقة الخامسة فيها الربوبيون و les agnostiques. الطبقة الرابعة فيها البوذيين والهندوس وإلي أشركوا بالله. الطبقة الثالثة فيها اليهود الكل لي عاشوا بعد مولد موسى. والطبقة الثانية فيها المسيحيين لي جاو بعد الرسول محمد والمسيحيين العاصين في عهد عيسى. أما ساعات تنجم تلقى طابق مخلط شيلة بيلا، ساعات الله يخفف على عبدو العقاب يهبطو لطابق أبرد من الطابق لي هو فيه وساعات يزيدلو في العذاب ويطلعو لطابق أسخن من الطابق لهو فيه.
أنا: وأنا فين باش نقعد؟؟؟
الهوكش: انتي توا ماشي للطابق لولاني أما مبعد ما نعرفش. أيا برى أدخل خليني نمشي نجيب بقية لعباد راهي الليستة طويلة! أيا تشاو
أنا: يعطيك الصحة عل المعلومات! تشاو
أيا قدمت لين وصلت لباب الطابق لول و لقيت ڨاريته و قدامها عساس قاعد يثبت فيا! أما منيش مصدق عينيا!!! أنا داخل بعضي وكيف شفت أبو بكر الصديق يخدم عساس في باب جهنم زادوا على ما بيا!كيفاش؟؟؟ أبو بكر في جهنم!! زعمة يتقوحبو عليا؟؟؟ زعمة الدين الصحيح هو لي حكاتو المذاهب الشيعية؟؟؟تطلعشي زادة الجنة معبية بجماعة اللائكية؟؟؟....دخلت في حيط معادش فاهم حتى حكاية وتلفت لأبو بكر
أنا: ياخي فاش قاعد تنيّك هوني؟ ماكش واحد من الجماعة لبشّرهم الرسول بالجنة؟؟؟؟
أبو بكر: خلي عزاها سكات بربي...
أنا: اتكلم! أنطق! راني باش نهبل! فاش تنيّك هوني؟؟؟
أبو بكر: الكلو من حادثة سقيفة بني ساعدة لعنة الله على هاك النهار الكلب!!! أنا قاعد نحضّر للجنازة متاع الرسول وجاني هاك الطحان عمر بن الخطاب وقلي الأنصار رشحوا سعد بن عبادة في بلاصتي للخلافة. ياخي مشينا الناس الكل للسقيفة وقعدنا نتنايكو 3 أيام على الخلافة ونسينا جثة الرسول لين ولات ريحتها ناتنة كي السفج. أما الحاجة الباهية ربي مش باش يدخلنا النار أما حطنا عساسة في جهنم كعقاب على لعملناه في الرسول بعد ما مات. فما كان عثمان وعمر ذاقوا النار الحمراء!
أنا: علاش عمر وعثمان كهو؟؟؟
أبو بكر: عمر محبش يطبق شرع الله وقت لي قال معادش باش نقصو يدين السارق خاطر الفقر كثر، وعثمان حرف كلام ربي زاد ايات ونقص ايات كيما الأيات لسب الله فيهم خالد بن الوليد قبل ما يولي مسلم وأيات الرجم وشطر سورة الأحزاب حرقها...إلخ. بالنسبة للجماعة لخرين هاونهم قاعدين في الڨاريته، نتبادلو على العسة كل مرة واحد... أيا يزي من السؤالات برى أعمل دورة في جهنم وبعد شد الصف الثالث باش تخلص عمايل الكفر متاعك وبعد تطلع للجنة.
أيا دخلت نعمل في دورة شفت برشة صفوف بجنب بعضهم كل واحد يستنى في دورو باش يعمل غطسة في النار والصفوف طويلة برشة خاطر جهنم معبية وما يجيك الدور إلا بعد ما ساقك تتكسر من الوقوف.
خليتهم وتعديت نكتشف اش فما واش ما فماش في جهنم وعلى عكس ما كنت نتوقع لقيت منظر يعشّق!!! ملول بقيت مستغرب كيف شفت الطيور والفراشات وبقية الحيوانات أما تفكرت الأيات القرأنية {وإذا الوحوشُ حُشرت} و {وَمَا مِنْ دَابَّةٍ فِي الأَرْضِ وَلا طَائِرٍ يَطِيرُ بِجَنَاحَيْهِ إِلاَّ أُمَمٌ أَمْثَالُكُمْ مَا فَرَّطْنَا فِي الْكِتَابِ مِنْ شَىْءٍ ثُمَّ إِلَى رَبِّهِمْ يُحْشَرُونَ} وعرفت إلي كيفنا كيف الهوايش الكل نتحاسبو أما ما فهمتش كيفاش الحيوانات الغير عاقلة تتحاسب وهي ما تخممش كيفنا... زعمة المعيز يتحاسب على قحبو(قحب معيز)؟ زعمة الكلبة الصارف تتحاسب على الكلاب الكل لي نيكت معاهم؟؟؟ زعمة السردوك حشاه خاطر تبع السنة ودار على دجاجات الحومة الكل؟؟؟(4 دجاجات+دجاجات ما ملكت ايمانهم+سبي دجاجات الجيران بعد الغزو على الجردة متاعهم).
الحاصل مشهد يعشق وخاصة أنا من محبي الطبيعة والحيوانات، الأغلبية الساحقة من الحيوانات لي ريتهم في الدنيا موجودين هوني ما عدا الجمال والخنزير وراشد الغنوشي وجماعة قناة الرحمة. فما زادة برشة حيوانات يعشقوا ما وصلتش عليهم كيف كنت في الأرض قلت باز جاو من نظرية التطور متاع داروين. أما الحاجة الخايبة مفماش برشة أنواع متاع أشجار فما كان شجرة الغرقد الكافرة...
 |
شجرة الغردق اليهودية ورد في رواية لمسلم: «لا تقوم الساعة حتى يقاتل المسلمون اليهود، فيقتلهم المسلمون حتى يختبئ اليهودي من وراء الحجر والشجر، فيقول الحجر أو الشجر: يا مسلم، يا عبد الله، هذا يهودي خلفي، فتعال فاقتله.. إلا الغرقد، فإنه من شجر اليهود» |
خزرت لشجرة الغردق نلقى برشة ذبان داير بيها و تفكرت إلي الرسول قال عمر الذباب أربعون يوماً والكلها في جهنم إلا النحل.. استغليت الفرصة وشديت كعبة ذبان باش نجم نحسب بيها الأيامات لباش نعديهم في جهنم وهانو كل ما تموت ذبانة نشد وحدة أخرى وهكاكة ما نضيعش في الحساب خاصة وانو طول النهار في جهنم يختلف كثيراً على طول النهار في الأرض...
أيا حاصيلو كملت نعمل في الدورة وما عجبنيش برشة الطابق لول متاع جهنم. الأغلبية من المسلمين العاصين ما تلقاش موضوع تنجم تحكي فيه معاهم: يا إما زبراطة، يا إما قحاب كارتي يا إما عباد ما تفرقش بين الشمس تدور على الأرض ولا العكس... مشيت شديت الصف جا قدامي كلوشار وورايا وحدة كانت تخدم في الماخور. وبديت نحكي مع هاك الكلوشار التونسي
أنا: أشنوا عملت انتي ؟
كلوشار: أنا كنت نزطل، وعلى البيرة ما نبطل، وحركة المرور نعطل، السرقة إختصاصي وفي التورست ديمة نحشكل، أما نقول لا إله إلا الله، وديمة نربرب ما نعرفش علاه! لين جاء ها النهار وصرمي بالنار الله كواه، أما عندي صاحبي كيفي حشاه، قبل ما يموت قتل توريست يهودي وفي البحر رماه، ياخي الله جزاه، ومن الخمرة رواه، من غير ما صلى ولا نهار إستعرف بتقواه. الأخرة زهورات يا صاحبي فهمتها كيفاه؟
تلفت للطفلة لكانت تخدم في الكارتي
أنا: ونتي اش عملت؟
هي: أنا حياتي تعدات كالحلمة تولدت بنت عايلة محافظة ولا عمري وصلت الناس بكلمة كنت نخاف حتى كيف تبدى الدنيا ڨمرة أما لزّتني الدنيا وعرّيت صرمي في الظلمة وتعلمت الهملة. الحكاية بدات مع ولد عمي لي حبيتو وفي عيوني خبيتو وفي لحظة ضعف دخت وشرفي عطيتو وبعد عمل لحية وقلي نادم علي سوّيتو وقال ما تلزموش المكسرة في بيتو وقلي كان سألوك قلهم لا نعرفو ولا ريتو...
وأنا نحكي اكاكا ونسمع في صوت فوشيك وموسيقا راقية جاية من فوق سألت الجماعة قالولي رانا ديمة نسمعو في أصوات حفلات وأجواء من فوق أما ما نعرفوش منين جاية. خرجت من الصف وقلت برى نرجع لأبو بكر لعل يتوصتلي باش نمشي نزور بقية الطوابق وقاعد نخمم كيفاش باش ندخّّلو في الموضوع باش ما يبعثنيش انيّك. وأنا نعرفهم ناس بكري يحبو برشة المدح والحشوات وصلت قدامو--
أنا: ما ننسى تاريخ الصديق القهار، و كيفاش تابو على يديه
الكفار، قريب لقلب الناس على ديارهم ديمة خرار مرار،
وفي مشاكل الأنصار، ديمة يخمم ما يرقد يعدي الليالي سهار،
راكب الخيل سيفو حار ما يرحم العدو و-les connards
ينظف منهم القبايل زنقة زنقة و دار دار!
أبو بكر: يعطيك الصحة يا سلوو إييييييه عندي برشة ما قالوا فيا
ها الكلام! العباد الكل نساتني! الدنيا غدارة...
أنا : ها بوبكر وخي باللهي باش نسألك ياخي أيمن صاحبي وينو؟
في الطابق السادس؟؟؟ وشنية حكاية الأجواء لنسمعو
فيها في الطابق لول؟؟؟ وبراس لحنينة تنجمش تتوصتلي نحب
نمشي نعمل طلة على بقية الطوابق؟؟؟
أبو بكر: أيمن صاحبك لا في الطابق لول ولا في الطابق العاشر، أيمن دوب ما دخل جهنم جات أوامر مل الفوق باش يطلعوه للجنة. بالنسبة للأجواء هذوكم في الطابق السادس الملحدين والكائن المطور من الانسان عاملين بعمايلهم والهوكش فقدو السيطرة عليهم هانو ساعات يهبطوا جماعة منهم كيما الخوارزمي والرازي يعملوا طلة على الطوابق لخرى ويرجعوا. وبالنسبة للطلان على بقية الطوابق تو نوصي العمدة برا إمشيلو طول من غير ما تشد الصف. أما ما نضمنلكش ينجم يدخلك تزور الطابق السادس كيما قتلك فقدنا السيطرة عليهم.
أنا: أيمن في الجنة؟؟؟تفدلك؟؟؟
أبو بكر: ماو قالكم الرسول كان واحد يتفكروه صحابو/اهلو في الجنة يشفعو فيه ويدخلو ربي في الجنة بحذاهم!
أنا: ملا حشوة!!! أمي وبابا ركعة ما يفوتهاش ونهار كامل يسبحو حتى في الطوالات! يمشيش يتحشالي ويهزوني للجنة قبل ما نعمل دورة في بقية الطوابق؟؟؟
أبو بكر: كون مهني تاو نتصرف كان جات حاجة مل فوق. برا أعمل دورة وما تحط شي في بالك!
أنا: يعطيك الصحة يا بوبكر!!! زايد معاك وبرا!!!
أيا مشيت من غير ما شديت الصف وقلت للعمدة إلي أنا جاي من طرف أبو بكر. قلي استنى شوية تاو نتلهى بيك وبعد جابلي هوكش وقلوا طلعوا للطابق الثاني. دخلت وكيما قالولي ملول لقيت المسيحيين الكل يبومو غادي ولا فما لا حيوانات ولا أشجار ولا والو... الدنيا الكلها حمرة والشهيلي يقطع النفس. محبيتش نقعد برشة أما مشيت نحوس بين الصفوف نلوج على هتلر باش نحكي معاه شوية ياخي ما لقيتوش وقلت بيني وبين روحي يطلعش ملحد زادة كيما قالت عليه الكنيسة... أيا أنا هكاكة نلوج عليه وتحط بزكريا بطرس--
أنا: شنوة زكريا حياتك كاملة ونتي تدافع على المسيح إبن مريم وفي لخر حشاهولك؟ لا شفاعة لا رحمة؟ مش قالوا المسيح تعذب على خاطركم؟
زكريا: طلع مش راجل وناكر الجميل البعيدة نعن دين زك امو القحبة إلي مشاة باعت ترمتها ليوسف النجار وبعد جات قالت راو الرب نفخلي في فرفوري وبعدها حبلت...إلي يتبع القحاب وولادهم يبات البرة يا سلوو...
أنا: ههههه! بربي باش نسألك: ياخي هتلر وينو؟ لوجت عليه ما لقيتوش!
زكريا: هتلر في الفردوس الأعلى توا! صحة لربو!
أنا: كيفاش كيفاش؟؟؟ هتلر في الجنة؟؟؟ ياخي مسلم هو؟
زكريا: لا لا! ماو كور باليهود وعبث بحالهم في l'holocauste والله يبخر بدم اليهود ياخي جزاه على تعذيب اليهود
أنا: باهي...بربي باش نسألك زادة على الولاد الصغار متاع المسيحيين قاعد نشوف كان في البالغين ياخي وينهم الوليدات لصغر منهم؟
زكريا: الولاد الصغار ما يتعاقبوش في جهنم هزهم ربي يخدموا في المسلمون متاع الجنة. ياخي ما تعرف حتى شي على دين الاسلام واش قال الرسول؟
أنا: لا لا نعرف! أما ها ليمات داخل بعضي معادش فار راسي من ساقيّّة وناسي كل شي... أيا نخليك الطابق هذا يجيب الكوبي خليني نمشي نكمل التحويسة مع الهوكش...
أيا رجعت للباب لقيت الهوكش يستنى فيا قتلوا راني فديت أيا نطلعو للطابق لبعدو وبدينا طالعين في الدروج و نخمم في نفخان الله في الفروج و حكايات هجوج و ماجوج داخل بعضي كالخيل إلي يحب يرتاح من قيد السروج وإلى اللقاء في الحلقة القادمة إلي باش يغماق فيها لون الروج...
